因林青霞而習武 變性人：葵花寶典呃人

100000+...



Terry自細喜歡穿女裝，曾經以為自己是易服癖，後來在電台聽到一位變裝皇后(drag queen) 的訪問，有感自己穿女裝時並非為了扮演什麼，只是自然不過。後來他透過跨性別團體，認清楚自己其實想做女人。雖然有一顆女兒心，但Terry本身強壯而好動，「細個睇《東方不敗  》，好沉迷林青霞呢個角色。有一幕講佢著女裝出來，在妓寨唱歌飲酒，好正啊！又靚又好打！我又想學功夫。」

經過多年鍛練，他早已是跆拳道黑帶三段、女子自衞術導師。為了性別重置，卻犧牲了一身武功，「接受賀爾蒙治療已經兩年，用抗雄激素、雌激素。肌肉明顯鬆弛咗，以前我都冇bye bye肉嘅。根據我師兄講，我而家嘅功力，得番以前六成。要得到一樣嘢，係要失去一啲。」

Terry現時長頭髮、著裙仔，但仍然鍾意女仔，豪爽的性格亦沒有改變，「性別認同，即係gender，同你原本的性別sex，還有性取向、性格，係四樣完全冇關係嘅事。但啲人成日炒埋一碟。好似阿媽教女咁，見個女著裙、腿張開，就話：你係女仔，要斯文啲；如果男仔喊，就話男兒有淚不輕流，調轉又唔會。自細咁教育，就定咗型。」

點解阿媽咁諗，其實又要多謝TVB，「無線的電視劇，跨性別人士或同性戀者，一係變態殺手、一係被殺冇個好角色。最離譜係《八卦神探》，講有個女仔被男性侵犯。所以好憎男人、要殺晒啲男人。潛台詞係，被男性侵犯過就會鍾意女人。咁係咪即係所有直男被男人侵犯過，所以鍾意女人?唔會㗎嘛！」「我同無線啲導演反映過。佢話，社會咁諗，就拍呢啲嘢迎合佢哋。你咁拍，就加強了呢啲的信息，變了惡性循環。」

    关注 港嘢SHOW