粤语随记

TOZ88.你来了 你走了 我看着你走向我 看着你远离我...

果日落雨，我无担遮

▷1.天，有D阴凉；地，有些少湿滑。可能落雨既关系，个人都感觉有D冻冻地。我毫无意识上左一部核突到狗咁既B2，可能夜晚人少，我竟然可以坐到一个窗边矫情专座。我个头系咁意侧侧地痴住个窗，睇住窗外既风景，哪怕玻璃已经俾雨点撇到好似马赛克咁。

▷2.

巴士播紧弥敦道，而我行进九洲大道。

都系一条道，好似相同又好似唔同。路边街灯好橙眼，橙到我散光100度既眼好似睇紧烟花一样。五彩缤纷，内心落寞到黑暗。第一次感觉哩条九洲大道咁Q长，第一次觉得中海大厦咁Q光，第一次觉得哩部巴士好Q矫情。

▷3.

一唔觉意换左一首歌，耳边响起熟悉既旋律～

我猛然眼鲸鲸，突然心口一阵胃酸(心口都有胃酸问你知惊未)，曾经好多人一起鸠up至深夜，家阵你地响边？唔系讲好左撩起裤脚一起讲粗口饮啤酒咩？之前果个打电话俾我话被女飞左，一直喊到凌晨两点既蛋散，你地两个好翻未啊？



▷4.

好多人渐行渐远，好多人系我既世界消失，亦有好多人既世界再都无我既位置，我可能会傻Hi Hi咁翻下你地朋友圈，翻下翻下剩翻一条线，核突过牙线既屏蔽线。

哦，好似都唔Q关我咩事，你地过得开心就好，始终吹过水，都希望大家发大达。

我地都大个仔，大个女了。好多野大家明白系咩回事就得，唔需要画公仔画出肠，好鬼死血腥…

▷5.

首歌仔最终系一句“总好于 那日我 没有 没有 遇过某某”既歌词结束，我亦都到站了，巴士系我身后开走左。

雨点变左雨粉，我大力咁索左一啖空气，好似索k咁一野精神左。

精神左，睇野好似都透左，然后憨鸠鸠行翻屋企，好似咩事都无发生过一样…

P.S.落雨一定要记得担遮，唔系既话好似一条粉肠系街到游荡，会被人送入青山。

    关注 TWONEZERO