女人友谊：好姊妹?!

女人友谊：好假嘅「好姊妹」？！逢周末，朋友圈差唔多就系晒生活精彩嘅战场，朋友留言讲句「好靓呀」、「好幸福呀...



逢周末，朋友圈差唔多就系晒生活精彩嘅战场，朋友留言讲句「 好靓呀」、「好幸福呀」就系唔少人望着手机做人嘅精神食粮。万千种赞入边，其中一种叫 #bff。

BFF，Best Friend Forever，由中小学纪念册写到大，到最后，仲有几多「朋友」、「好姊妹」可以keep住联系？或者系QQ/微博/微信加咗做朋友几年，间中会讲句例牌嘅Happy Birthday，但系一直都无再见面。成长系不同嘅圈子，过唔同嘅生活，对于那些年「永不分离」嘅好姊妹，你对佢嘅认识，可能净系朋友圈上见到嘅旅行照、美食照，你会发觉你愈嚟愈唔了解佢。

或者有一晚会谂起佢，谂翻起以前嘅时光，但系再无勇气讲旧时，打开咗讯息，写咗一半，算喇，都系删咗，费事面懵。

然而几年无见，总会系朋友嘅婚宴度撞返，或者系某天扫货时偶遇，变得世故嘅「姊妹」，会话：

「好耐冇见，你过得点呀」
「系呀，好挂住你呀」
「系啰，好挂住以前日日见咁呀」
「哎呀我哋应该约出嚟High Tea呀」

或者，呢啲都系客套说话，但总有一方，有意无意咁建议日期、地点，另外一个迷迷糊糊咁又应成咗。

两个人拣咗某个周日，出发之前好鬼忐忑，谂下等阵讲啲乜好咧？要表现出生活美满，又要着靓靓、妆化得精神爽利，惊俾唔过佢。

明明，以前糖黐豆，暗斗呷醋一定有，但总会日日笑住一齐过，无咁多顾虑，到人大咗，谂得太多太远，同当年嘅Friend聚下旧，竟然有啲压力。

一见面，又是客套咁讲 「你点呀」、「几好呀」，大家慢慢努力搵话题，由面前嘅三层糕点，讲到最爱嘅餐厅；再言不由衷咁赞对方裙靓、耳环闪闪；一路讲到电视剧、旅行之类嘅无啦楞嘅话题。拍拖？结婚？有啲地雷不会掂。佢唔会同你讲，曾经同你中学果阵嘅男神师兄秘密拍过拖；你也不会同佢讲，当年佢嘅一个男友，同你Secret Crush咗半年。

下午茶食咗大半，咖啡有啲酸，两个人都觉语言无味，唯有保持面具式微笑举住手机影影影，然后将合照慢慢美图（当然只会美肌自己），然后打几句：

「感恩多年冇见，我嘅好姊妹！爱死你 :心心emoji:」
「幸福系，好朋友十几年前同十几年后都会一直系我身边。」
「N年冇见过呢个人 点解bb可以完全冇变过？」

咁样嘅姊妹情已经变晒味喇，其实当你谂住再搵翻旧时啲Friend果阵边使咁小心翼翼啊，大胆啲讲声问候都好，人哋自然会Feel到你嘅真心。无论男仔女仔都受用架！

    关注 逆转潮流