【老公總有出頭天】張頴康捱到有獎攞 張繼聰唔使再被冠妻姓

2008年蔡少芬嫁畀張晉，當時一般人都覺得男方名氣比女方低，好在男方爭氣，幾年來默默耕耘，已經捱出頭。而喺圈...





2008年蔡少芬嫁畀張晉，當時一般人都覺得男方名氣比女方低，好在男方爭氣，幾年來默默耕耘，已經捱出頭。而喺圈中都有唔少女星「好眼光」或旺夫，老公越撈越掂，老婆自己梳乎富貴。

張頴康、麥雅緻
現年35歲嘅張穎康，曾經泊過劉德華碼頭，惜無助星途，到2006年，佢加入無綫，不過演親都係茄喱啡或客串，最紅都只係單元男主角，甚少人記得，直至2013年喺《師父‧明白了》開始受注目，其間佢一度為家計脫離娛圈。
張頴康於2014年迎娶05年落選港姐麥雅緻，佢話全靠老婆支持佢重返娛圈尋夢，卒之張頴康喺舊年嘅《一屋老友記》飾演「三寶」令其人氣急升，並獲得《2016年萬千星輝頒獎典禮》嘅「飛躍進步男藝員」，麥雅緻可謂守得雲開。

張繼聰、謝安琪
將會喺今年再度添B嘅張繼聰同謝安琪，係老公「捱到吐氣揚眉」嘅經典例子，佢哋喺2007年結婚，當年謝安琪已經貴為人氣女歌手，相比起嚟，張繼聰嘅知名度的確冇咁高，甚至有網民叫男方做「謝繼聰」。但張繼聰同謝安琪堅持自我，完全冇受影響。直到近年張繼聰捱出頭來，憑其演技先後喺無綫劇集《巨輪》同《老表，你好Hea！》等有出色表現，開始備受觀眾認同及關注。直至前年喺《四個女仔三個BAR》升做第二男主角，到同年播出嘅《收規華》中更加係首次擔正。

曹永廉、姜依蘭
現年52歲嘅曹永廉，早喺1994年以歌手身份出道，不過其歌唱事業遠不及其演藝事業更精采，阿廉喺2000年於《妙手仁心II》中飾演「向眾仁」廣為人認識，其後先後喺《戇夫成龍》及《法證先鋒》等大小劇集中演出。阿廉於2007年娶資深演員姜大偉女兒姜依蘭為妻，星途一般嘅阿廉終喺舊年，憑住古裝劇《公公出宮》嘅「細雞」一角冒出頭，佢先後喺《星和無綫電視大獎》榮獲「我最愛TVB男配角」，以及《2016年萬千星輝頒獎典禮》榮獲「最佳男配角」獎。

鄭中基、余思敏
1996年，挾住當年寶麗金唱片亞洲太平洋區總裁鄭東漢之子之名加入樂壇嘅鄭中基，喺當年偶像歌手大行其道之時，以其實力派唱腔殺出一條新血路，喺港台等地大受歡迎，可惜2000年一次喺回港嘅航班上醉酒鬧事，自此其事業走下坡。轉戰大銀幕嘅鄭中基正喺影圈發展得唔錯時，被揭同《追擊八月十五》嘅拍檔蔡卓妍（Sa）秘戀，2010年二人舉行記招承認婚事，同時宣佈離婚。不過，就喺鄭中基咁一團亂之時，有線娛樂台前主播余思敏戀上鄭中基，兩人於翌年奉女成婚。轉型變成好爸爸、好老公嘅鄭中基成功翻身，到上個月，余思敏喺鄭中基紅館個唱中公開愛的宣言，獲網民like爆。

蔡卓妍、陳偉霆
雖然呢一對未結婚，亦已經分咗手，但係都係拍拖後，男方越來越紅嘅例子，2010年，阿Sa同同門師弟陳偉霆公開戀情，然而，女尊男卑太明顯，外界都唔睇好呢段戀情，後來陳偉霆北上搵人仔，再憑一套《古劍奇譚》跑出，開拓大陸巿場，正當以為佢同阿Sa之間嘅距離拉近之時，就爆出兩人聚少離多，感情生變，至前年9月，阿Sa宣告呢段5年情劃上句號。

    关注 看港剧