向阳 南方孤岛——写予屈原

经典文学大家读南方孤岛——写予屈原汝企伫两千三百年前的江边江中水涌搅吵汝不平的心一路行来，上高山过溪埔离开所...

汝企伫两千三百年前的江边

江中水涌搅吵汝不平的心

一路行来，上高山过溪埔

离开所爱的故乡佮国都

一路行去，是茫雾的前途

宛然孤鸟，有树无岫

汝的悲哀仝款无地安搭

攑头看，苍天渺茫

越头望，乌云重叠

忧加愁，是汝的姓汝的名

孤加单，是汝的运汝的命

汝是一只孤鸟，喝咻到梢声

汝行过两千三百年前的江边

面色青恂恂，目神缀风咧吹

天风冷冷冷，共汝寒到呿呿嗽

江水浊浊浊，鱼仔虾仔看拢无

汝毋愿缀时行，参人弹仝调

汝无爱讲白贼，啉酒练痟话

燕仔伫庙堂踅过来踅过去

鸱鴞的翅展开就是规片天

掠鱼人问汝哪会落魄到这款地步

无言。沧浪之水若清，会当洗我的衫

无语。沧浪之水若浊，会当洗我的跤

汝是南方的孤鸟，有厝煞无路

南方的孤鸟，汝剖腹爱国家

伫战国年代，秦国并吞的诡计进前

有话敢讲，讲楚国独立的必要

忠直进言，言百姓生活的苦楚

汝是咬住木兰花蕊的露水

早时讲煞，暗时官位就被挽去

汝是无情风雨扫落涂跤的菊花

清气身躯，予人踲踏到乌趖趖

汝是南方上盖寂寞的孤鸟

夜深的时，汝的怨叹敢有人听见

是爱佮鸱鴞伫天顶比翅双飞

抑是欲佮鸡仔伫笼仔内争食

南方的孤鸟，汝终其尾飞入文学史

飞诚悬，汝的离骚是诗国上媠的花蕊

飞真远，两千外冬后我犹咧读汝的诗

汝用楚国的话写参中原无相仝的诗篇

写巫灵、写天国、写幽都，写出一部楚辞

汝坐踮飞龙驶的象牙车

提彩虹做七色旗，一路奏九歌

飞向西天，飞去彭咸住的居所

天风冷吱吱，国无人莫我知兮

江水白铄铄，又何怀乎故都

两千三百冬后的暗暝

我伫离汝诚远的台湾重读汝的诗

    关注 港台文学选读