粵語經典廣告： 珠江橋牌玉冰燒(1979)

下面呢首，係1979年嘅香港廣告歌，商品係廣州出產嘅「珠江橋牌玉冰燒」，相信好多70、80後嘅朋友依然記憶猶新。...

今日天口真係怪，熱得嚟又落雨絲溼，認真惡頂，我諗臨瞓前睇返個盞鬼嘅廣告肯定有助於睡眠。兩廣，地處亞熱帶，因為氣侯濕熱，所以並唔盛行飲用白酒。同樣因為呢個原因，兩廣出產嘅出名白酒亦都唔多。不過唔多，並唔代表冇，廣西三花酒同廣東玉冰燒就係當中佼佼者。

玉冰燒，產自廣東佛山，乃係典型豉香型白酒，以清道光十三年(公元1833年)佛山陳太吉酒廠出產為正統。至於玉冰燒點解叫玉冰燒？關鍵在於釀酒嘅最後一環節———將蒸出嚟嘅米酒，導入佛山特制嘅大㼜之中，然后浸入大概100kg嘅肥豬肉，經過大缸陳藏，再精心勾兌。造出嚟嘅酒玉潔冰清，口味醇和。又因為廣府話之中，「肉」「玉」同音，為求酒名文雅，就將呢種由肥豬肉浸泡釀製嘅白酒，稱為「玉冰燒」。

玉冰燒酒下面呢首，係1979年嘅香港廣告歌，商品係廣州出產嘅「珠江橋牌玉冰燒」，相信好多70、80後嘅朋友依然記憶猶新。睇落普通嘅一首廣告歌，卻係由顧家輝作曲、黃霑作詞、太極樂隊嘅Patrick演唱，陣容認真夠嗮豪華。成首歌祗有「斬料，斬料，斬大嚿叉燒，油雞鹵味樣樣都要，斬大嚿叉燒。玉冰燒，有玉冰燒，飲盃玉冰燒啦。勝嘅！」區區幾句，配以地盤工人大佬做嘢、聚餐嘅畫面，顯得爽朗、粗獷、生動，有一種男人味，真實，自然。1979年嘅香港廣告已經有如斯水準，反觀38年後嘅2017年，廣東嘅電視廣告依然都仲充斥住腎透支、白內障，小小一個廣告，已經可以反映出創作思路、水準上面嘅巨大差距……

    关注 粵港豬事丁