洪永城丨唐诗咏喜帖街拖手 上半山看楼  Tony不回应结婚之说

大台花旦一個一個做人妻，睇嚟不久嘅將來人妻黨又添一位成員，講緊邊個？之唔係唐詩詠囉！噚日傍晚6點15分左右，一身黑色背心連身裙嘅唐詩詠戴住黑帽，揸車現身囍帖街，首先佢去咗便利店增值，睇嚟係驚泊車冇錢，其間佢講住電話，而男友洪永城就前後腳揸車入停車場，佢哋仲將架車泊埋一齊，就開始行囍帖街。去到8點左右，佢哋同一位男友人一齊離開，洪永城冇揸自己架車，反而坐喺女友架車嘅後座，而友人就坐車頭，之後唐詩詠車咗友人去中環就離開，而洪永城就爬返上前座，佢哋就去咗西半山遊車河，遊足半個鐘後就喺屋蘭士里停車，一落車洪永城同唐詩詠就對附近嘅物業指手劃腳，仲不斷討論咁，似乎好有興趣咁噃！佢哋之後仲行上西城公園散步，記者現場所見佢哋仲罕有拖手o添！當記者接近時，佢哋驚青彈開，問到去囍帖街係咪睇婚嫁嘢，唐詩詠即時好大反應話：「梗係唔係啦！」而洪永城就keep住微笑咁表示唔回應，不過就好nice咁叫記者小心。問到佢哋頭先對附近物業指手劃腳，係咪想一齊置業或者同居，追問之下洪永城就話：「有朋友住呢區，知道呢度幾靚，有個公園，食完飯咪嚟散下吓步。」問到佢係咪好滿意呢區，又拖晒手，會唔會同居呀？洪永城繼續微笑就上車走人。洪永城和女友唐詩詠拖手睇樓為結婚鋪路，圈中不少情侶被爆睇樓後均傳出好事近，王祖藍婚後更豪擲1.2億豪宅送給老婆李亞男。

    关注 香港TVB资讯台