“妈子牌”必备良药：食返碗粥

朝朝一碗粥：艇仔粥、及第粥、明火白粥、咸猪骨粥、窝蛋牛肉粥、皮蛋瘦肉粥.........





广东人钟意食粥，认为食粥有益健康。所以都有朝朝一碗粥，饿死医生一屋嘅讲法。

细个嗰时，逢亲头晕身㷫、屙呕肚痛、胃口唔好，阿妈就会煲各种各样粥水。奇怪嘅系，食药未必会好，但系食啖粥，肯定会好得快啲！

除咗有益，我哋食粥，更加钟意佢嘅味道同呢种习惯。一煲靓粥，晶莹剔透、柔腻香滑、白如牛奶。就算系冇加任何调味、冇加料嘅明火白粥，依然有米粒嘅香味。

讲起粥，比起其他食物，大部分广州人可能更加有感情，无论从一日之初、中午充能定系一日结尾，我哋都可以用简单嘅一碗粥嚟满足自己。今日同大家介绍下，广州最出名嘅两个粥！

讲到出名嘅粥，就不得不提



——爽滑、鲜甜、最刺激味蕾，当数艇仔粥

艇仔粥以新鲜河虾或鱼片作配料，仲有瘦肉、油条、花生、葱花、浮皮、海蜇、牛肉、鱿鱼、烧鹅等。



艇仔粥点嚟嘅？

讲古佬彭嘉志话你知：

（仅为其中一个流传的说法）

话说一日，一个老艄公喺珠江河上面救到一个轻声跳河嘅男子。



原来呢位男子系个“二世祖”，老窦留低一大笔身家，但系二世祖洗脚唔抹脚，将身家全部败晒，所以家道中落，绝望之下走去自杀。

艄公听完佢嘅遭遇，说服佢同自己一齐开粥店。艄公负责煲粥，二世祖食惯山珍海味，食不厌精，提出改良意见最适合不过。



佢哋用猪骨熬粥底，加入生鱼片、油炸鬼、炸花生、炸粉丝、烧鹅丝、鱿鱼丝、海蜇丝、炒蛋丝。呢种粥既有猪骨嘅香味，又有海鲜嘅鲜甜，仲有烧鹅、花生嘅香脆，结果大受欢迎！



而呢种粥，就系艇仔粥。（船上煲粥，船上卖）

同艇仔粥齐名嘅，当然系



——全称“状元及第粥”，相传同一个状元林召棠有关当年高考，两日都去食及第粥！

然后就...#￥%&*

讲古佬彭嘉志话你知：

（仅为其中一个流传的说法）

清朝道光年间，有一个书生叫林召棠，每日都会去老乡林老昌嘅档口食粥，久而久之，两人都非常熟落。



后来林召棠上京赴考，高中状元。

回乡后，都不忘去林老昌嘅粥档食一碗粥，感慨万分：“难怪我会高中状元，昌叔，你呢碗粥，肉丸即系状元、牛膀（现改用猪肝）即系榜眼、粉肠即系探花，呢碗系状元及第粥啊！”



林召棠仲为林老昌题字写一块牌匾“昌记‘弓弓’店”。有人笑林召棠，贵为状元都写错字，“粥”字点可以冇“米”呢？



林召棠笑住同林老昌讲：“我点会写错字啊，我特登唔写中间个米字，咁啲米去咗边？咪去咗你嘅米缸度咯！”

食粥，适合配搭油器或者炒粉面。

早排喺“干炒牛河”里面都提过，本人曾经用一个星期喺屋企附近嘅大排档观察“宵夜最多人点嘅菜式”，牛河同粥叮当马头！单一碗粥，可能唔够饱，加多碟干炒牛河，绝配！

参考书籍：《岭南词典》——周伟励

《童说岭南-广饮广食》——彭嘉志

《广州方言民俗图典》——杨逸等

图片素材来源于网络



廣古封丁酉年全新設計，每盒包含六款，吉利廣東俚語設計，最啱派利是豪气爽手嘅老世！手機掃描背面二維碼，即刻挑戰【估畫粵語】，今年拜年同兄弟姐一齊鬥智啦！

    关注 羊城网