【Bee+电台】第1篇 一个珠海人和Bee+的故事

不用你看，只想你听...

Hello, 我叫Lingo, 我系一个唔系土生，不过土长嘅珠海人。系广州读书，毕业之后系广珠澳做咗几年嘢。5年前返到珠海，宜家系南方软件园一家航运IT 公司工作，任职产品专家。

认识小蜜蜂之前，就已经被佢地嘅蜂巢吸引。终于落成出现系D4嘅时候，我都好好奇，呢班究竟会系D乜人，竟然可以将我曾经幻想过嘅用货柜设计嘅建筑物，整咗出来。因为工作嘅关系，对货柜可以话系好熟悉，一眼睇出唔系整柜设计，不过成个设计出来嘅效果真系好得。开先我以为佢地系揾专人设计，不过后来知道佢地原来系用乐高积木砌出来嘅模型，再揾专人将模型转换成图则，最犀利嘅系，佢地冇一个人系读建筑设计，真系估佢地唔到咯。

所以我对呢班小蜜蜂有一种好强烈嘅好奇心。今年5月嘅时候，佢地搞咗个English Corner. 当我系电梯度见到张Poster嘅时候，我个心系好兴奋嘅。 原因系5年前我啱啱从广州返来珠海个阵，我系拱北文华书店有host过英语角，不过后来因为种种原因（主要系因为离公司太远），就冇再去个Corner. 系南软返工之后我一路都对English Corner念念不忘。畀我发现咗系公司附近有个English Corner,我梗系开心到晕啦。事实证明呢个Corner同出边个D都好唔同，我自己都估唔到，join咗个corner会对我有咁大嘅影响。

其实一开始我系唔想做host嘅。其实一开始我只系想帮下呢班小朋友。读心理学嘅大卫应该系应用咗一D心理学技巧氹咗我落搭，唔知点解我就应承咗佢做host.同之前嘅corner最大嘅唔同之处，小蜜蜂嘅corner系有topic嘅。个topic重要讲足个半钟。我对English Corner嘅理解系一个可以讲英文嘅场合，但系其实，系呢个大部分人都唔讲英文嘅国家，呢种场合里面大部分人都唔敢开口。所以大部分嘅corner,系得两三条友仔讲，其他人系度听。如果讲紧嘅话题系好鬼闷嘅话，咁就真系冇人想讲。我终于知道，点解之前嘅corner会越来越少人，我都终于知道其实English Corner未必真系可以提高到口语水平，如果你只系来听嘅话。不过讲真，其实English Corner,可以唔净只系讲英文咁简单，因为语言只不过系个工具，你可以搞到几好玩，就睇你点用呢个工具。

我系一个三天打鱼两天晒网冇乜毅力嘅人。同时我系一个有好多谂法，但系就冇乜动力实践出来嘅人。宜家都依然系咁。不过有D唔同咗嘅系，开始有动力去实践一D自己嘅谂法，都慢慢咁系度锻炼紧自己嘅毅力。我觉得系呢班九十后嘅后生仔女畀咗我一D 灵感同埋激励。

    关注 BeeHome